52 mulleres mortas, ata o día desta publicación. Hoxe 28-11-23 mortas 3 máis.
Cando vai parar?
No colexio tratamos de concienciar, para eso fixemos unha serie de actividades durante toda a semana:
- O mural sobre "para que son as mans?", en que dicimos BASTA.
- O Scape Room, proposto polo Concello, a cargo da empresa Lucus Scape Room
- O atado de lazos no muro do colexio.
- O obradoiro "A Cidade Violeta", dirixido polo escritor e ilustrador Anxo Fariña.
- Reparto do material da Fundación ANAR.
Cada neno e nena levou para a casa unha pulseira co teléfono no que se pode pedir axuda.
Agora imos ver a foto do díptico que levaron os maiores de 5º e 6º e que, no caso dos que xa se van ir pronto cara o instituto, nos pon alerta sobre certos sinais e como actuar diante destas situacións de violencia de xénero e acoso. Estes van estar presentes nas aulas e na entrada do colexio e na conserxería.
A Fundación ANAR, coa que o Goberno ten un acordo, proporcionou este material.
Para os maiores este vídeo, que verás clicando aquí. O vídeo vai incidir en momentos, máis habituais do que pensamos, que non deben deixar que ocorran. O título e nome da campaña é "La violencia contra la mujer no tiene edad".
Cada ano tentamos que o alumnado do colexio sexa consciente, dentro das súas capacidades de comprensión, de que a violencia non é o camiño. No terceiro ciclo xa comezan a entender que é a violencia contra a muller.
Non perdemos a esperanza de que as campañas e actividades de concienciación axuden a que escollan unha boa persoa como compañía de vida, unha vida plena e libre.
A lei contra a Violencia de Xénero establece no artigo 17 a garantía dos dereitos das vítimas, con independencia da súa orixe, relixión ou calquera outra condición ou circunstancia persoal ou social.
Cantas formas de violencia contra as mulleres existen?
A violencia contra a muller ten moitas formas de manifestarse:
1. Pode ser violencia física: golpes, empurróns...
2. Pode ser violencia psicolóxica: insultos, menosprezos...
3. Violencia vicaria: A violencia vicaria é a que utiliza o maltratador para facer dano á muller, a través dos seus seres queridos, sobre todo dos fillos e fillas.
O TELÉFONO PARA DENUNCIAR AGRESIÓNS CONTRA A MULLER É O
016
Que é o 016?
O 016 é un servizo telefónico de información e asesoramento xurídico en materia de violencia de xénero.
Este servizo está coordinado polo Ministerio de Sanidade, Servizos Sociais e Igualdade, por medio da Delegación do Goberno para a Violencia de Xénero.
Poden saber se chamei ao 016?
A chamada a este servizo non deixa pegada na factura. A chamada é confidencial. Non aparece tampouco na factura nin na marcación do móvil e nunca no rexistro de chamadas realizadas do teléfono.
Cando podo chamar? Canto custa a chamada?
O 016 funciona as 24 horas do día, os 365 días do ano. É un servizo de balde.
Quen está ao outro lado?
Ao outro lado atenderante un equipo de profesionais con formación especializada en violencia de xénero.
Quen pode chamar a 016?
Ao 016 podemos chamar todos e todas: as vítimas de violencia de xénero, persoas do entorno da vítima (familia, amizades, veciños-as, etc.), profesionais que estean atendendo a vítimas de violencia ou que coñecen unha situación deste tipo.
Que pasa se o 016 detecta que hai un risco?
O seguinte paso vai ser derivar a chamada ao 112 e así dan resposta rápida.
O 016, un servizo moi completo. Que información ofrece?
A información pode ser sobre servizos sociais, emprego, recursos de acollida, axudas económicas, etc.
Para dar estas informacións temos dous departamentos:
a) Departamento de Información Xeral. Informa de onde se prestan os servizos de atención, emerxencia, apoio e recuperación.
b) Departamento de Asesoría Legal. Este departamento dá información legal especializada en materia penal (sobre medidas cautelares, sobre ordes de protección), en materia civil, de custodia dos-as fillos-as, información sobre estranxeiría (asilo) e outras.
O 016, os menores e as persoas con discapacidade.
Os-as menores son vítimas da violencia, para eles-as, o 016 ten un acordo con ANAR (Asociación de Axuda a Nenos e Adolescentes). O teléfono para atendelos-as é o
900 20 20 10. Ver os dípticos a cor de máis arriba.
As persoas con problemas de audición ou de fala poden poñerse en contacto co 016 a través do número 900 116 016.
Desde o 3 de xullo de 2009 o 016
incorpora un sistema de traducción simultánea en 51 idiomas.
A ONDE MÁIS PODO ACUDIR?
Podes denunciar chamando ao 091, que é o teléfono da Policía Nacional. Este corpo de seguridade ten, hoxe en día, unidades especializadas en atención e seguimento de casos de violencia de xénero.
No hay comentarios:
Publicar un comentario